Светската здравствена организација предупредува дека јули и август се најризичните месеци за ширење на вирусот. Во Македонија досега се регистрирани осум случаи, а најголемиот дел од заразените воопшто немаат симптоми.

Западнонилската треска повторно е во фокусот на здравствените власти во Европа. Светската здравствена организација (СЗО) предупредува дека сезоната на пренос на вирусот, која трае од доцна пролет до есен, сега е во својот најризичен период. Додека бројот на случаи расте во неколку европски земји, во Македонија досега се регистрирани осум потврдени случаи, при што сите биле со тешка, невроинвазивна форма на болеста.

Регионалниот директор на СЗО за Европа, Ханс Хенри П. Клуге, ги повика граѓаните во погодените подрачја да преземат едноставни, но ефикасни мерки за заштита.

„Едноставни чекори како покривање на телото со облека, користење средство против комарци и отстранување на застојаната вода околу домот можат значително да го намалат ризикот од инфекција“, порача Клуге.

Најголемиот дел од заразените немаат симптоми

Иако вирусот предизвикува загриженост, експертите нагласуваат дека кај 70 до 80 проценти од заразените лица инфекцијата поминува без никакви симптоми.

Кај останатите може да се појават: покачена телесна температура, главоболка, замор, болки во мускулите, мачнина или повраќање, осип, зголемени лимфни јазли.

Во ретки случаи – приближно едно од 150 заразени лица, вирусот може да предизвика тешка невроинвазивна болест, како што се менингитис или енцефалитис, кои можат да бидат опасни по живот. СЗО препорачува секој што по убод од комарец ќе развие висока температура, осип или вкочанет врат веднаш да побара лекарска помош.

Осум случаи во Македонија се само „врвот на сантата мраз“

Професорот по епидемиологија Драган Даниловски предупреди дека бројката од осум регистрирани случаи не ја покажува реалната распространетост на вирусот. Според него, сите досега потврдени пациенти во Македонија имале тешка невроинвазивна форма, но тоа не значи дека вирусот предизвикува тешка болест кај сите заразени.

„Осумте регистрирани случаи се само видливиот дел од една епидемиолошка ‘санта мраз’. Најголемиот дел од инфекциите остануваат непрепознаени бидејќи лицата немаат симптоми или имаат лесна клиничка слика“, објасни Даниловски.

Тој посочи дека најголемиот дел од случаите се автохтони, што значи дека заразата е стекната во Македонија, а не при патување во странство. Тоа укажува дека вирусот веќе циркулира локално преку природниот циклус меѓу птиците и комарците.

Најмногу случаи во Грција и Италија

Според најновите податоци на СЗО, Грција бележи најголем пораст на заболени. До 22 јули таму се потврдени 21 случај, од кои 20 се со тешка невроинвазивна форма, а 13 пациенти сè уште се хоспитализирани.

Во Италија се регистрирани 21 случај во 17 различни подрачја, што претставува најширока географска распространетост на вирусот оваа сезона.

Локално пренесени инфекции се потврдени и во Македонија, Романија и Шпанија.

Климатските промени ја зголемуваат опасноста

Од СЗО предупредуваат дека климатските промени создаваат услови комарците да се размножуваат подолго во текот на годината и да се шират на нови територии.

„Западнонилскиот вирус не е нова закана, но условите што го поттикнуваат неговото ширење брзо се менуваат. Потоплите температури и подолгите лета им овозможуваат на комарците повеќе време и поширока територија за пренос на вирусот“, предупреди Клуге.

Како да се заштитите?

Светската здравствена организација препорачува:

• користете репеленти против комарци;
• носете светла облека со долги ракави и ногавици;
• избегнувајте престој на отворено во зори и навечер кога комарците се најактивни;
• поставете заштитни мрежи на прозорците и вратите;
• користете мрежи над креветите, особено кај малите деца;
• редовно празнете саксии, кофи, буриња и други садови со застојана вода каде што комарците се размножуваат.

Во моментов не постои одобрена вакцина за луѓе, а лекувањето се сведува на ублажување на симптомите и болничка нега кај пациентите со потешка клиничка слика. Затоа, здравствените власти нагласуваат дека превенцијата останува најдобрата заштита од оваа инфекција.