Шпанскиот премиер Педро Санчез побара од Европската Унија да формира Европски центар за одговор на шумски пожари за западниот Медитеран, кој би бил сместен на островот Мајорка. Санчез соопшти дека испратил писмо до претседателката на Европската комисија, Урсула фон дер Лајен, во кое предлага новиот центар да биде лоциран во воздухопловната база Сон Сан Хуан на Мајорка.

„Локацијата што ја предлагаме за центарот за борба против шумски пожари во западниот Медитеран е островот Мајорка“, изјави Санчез.

Тој посочи дека Шпанија во моментов се бори со десет активни шумски пожари со различен интензитет, меѓу кои и новите пожари во покраините Замора и Леон, додека состојбата постепено се стабилизира во Авила и регионот на Мадрид, каде што започна укинувањето на дел од мерките за евакуација.

Премиерот ја оцени ситуацијата како „критична“ и „исклучително сложена“, предупредувајќи дека високите температури, ниската влажност на воздухот и силните ветрови овозможуваат пожарите да се шират многу побрзо отколку вообичаено.

Тој ги повика граѓаните да се информираат исклучиво преку официјални извори и проверени медиуми и да не наседнуваат на дезинформации и лажни вести.

Според официјалните податоци, од почетокот на годината во Шпанија изгореле повеќе од 172.000 хектари, а најтешко погодени се областите Авила, Мадрид и Кастељон. Владата досега прогласи 211 вонредни состојби на цивилна заштита во 14 автономни заедници, при што најголемиот дел се поврзани со шумските пожари.

Предлогот за нов европски центар доаѓа во период кога повеќе земји од јужна Европа се соочуваат со рекордна сезона на пожари, а европските институции предупредуваат дека климатските промени значително го зголемуваат ризикот од вакви катастрофи.