На Универзитетската клиника за инфективни болести и фебрилни состојби се лабораториски потврдени два случаи на западнонилска треска. Двајцата пациенти се хоспитализирани, се наоѓаат под постојан медицински надзор и примаат терапија во согласност со современите медицински протоколи. 

Од Клиниката информираат дека состојбата на пациентите внимателно се следи, а воедно упатија апел до граѓаните да ги почитуваат препораките за заштита од убоди од комарци. Се препорачува користење репеленти, носење облека со долги ракави и ногавици при престој на отворено, поставување заштитни мрежи на прозорците и избегнување престој во близина на застоени води, особено во вечерните и раните утрински часови кога комарците се најактивни. 

Западнонилската треска е вирусно заболување што најчесто се пренесува преку убод од заразен комарец. Поголемиот дел од заразените немаат симптоми, но кај дел од пациентите може да се појават покачена температура, главоболка, болки во мускулите и зглобовите, замор и осип. Кај постари лица и кај пациенти со ослабен имунитет, болеста може да предизвика сериозни невролошки компликации, како менингитис или енцефалитис. 

Здравствените власти потсетуваат дека во летните месеци ризикот од појава на западнонилска треска е поголем поради зголемената активност на комарците. Затоа, покрај личната заштита, важни се и мерките за намалување на местата каде што тие се размножуваат, како отстранување на застоена вода околу домовите и редовна дезинсекција.