Украински дронови рано утрово погодиле повеќе цели во Русија и на окупираниот Крим, меѓу кои нафтено складиште во Московската област и логистички објекти на интернет-трговецот Wildberries, компанија која често се нарекува „руски Amazon“.
Во нападот врз логистичкиот центар на Wildberries во Котовск, во Тамбовската област, загинале седум работници, соопштија локалните власти.
Според Reuters, брановите украински напади со дронови предизвикале пожари и во складиште јужно од Москва, како и во нафтено складиште во поширокото подрачје на руската престолнина.
Погоден логистички центар на Wildberries
Според Telegram каналите ASTRA и Exilenova+, дрон погодил логистички комплекс на Wildberries & Russ во индустрискиот парк Котовск. Објектот почнал со работа во 2025 година.
Гувернерот на Тамбовската област, Евгениј Первишов, соопштил дека во нападот загинале седум вработени од ноќната смена. Руските државни медиуми наведуваат дека има и повредени лица.
Втор пожар избувнал во складиште на Wildberries во Електростал, околу 50 километри од Москва. Според Exilenova+, станува збор за еден од најважните логистички објекти на компанијата според обемот на обработка на нарачки.
Проектот ASTRA наведува дека OSINT аналитичари го потврдиле пожарот врз основа на отворени извори.
Зошто Wildberries го нарекуваат „руски Amazon“
Wildberries е најголемата руска платформа за онлајн купување и доминантен играч на тамошниот e-commerce пазар.
Компанијата почнала со работа во 2004 година, а ја основала Татјана Бакалчук, поранешна професорка по англиски јазик. Бизнисот го започнала со препродажба на облека од германски каталози за време на породилно отсуство.
Во текот на две децении, Wildberries прерасна во голем деловен систем, а Бакалчук стана една од најбогатите жени во регионот.
Иако компанијата првично била фокусирана на мода, денес функционира како огромен marketplace на кој илјадници независни продавачи нудат електроника, козметика, храна, облека и производи за домаќинство.
Еден од клучевите на успехот е логистичкиот модел со десетици илјади пунктови за подигнување пакети низ градовите. Дел од нив имаат и кабини за пресоблекување, па купувачите можат да нарачаат облека во повеќе големини, да ја пробаат на лице место и да платат само за тоа што им одговара.
По доминацијата на домашниот пазар, Wildberries се прошири и во соседни земји како Белорусија, Казахстан, Ерменија и Киргистан. Пред санкциите и геополитичките превирања во 2022 година, компанијата имала амбиции и за пробив на пазарот на Европската Унија.
Денес, и покрај изолацијата на руската економија, Wildberries заедно со својот главен конкурент Ozon има силно влијание врз навиките за онлајн купување на милиони луѓе во регионот.
Горело и нафтено складиште кај Москва
Во Московската област било погодено и нафтеното складиште Ногинск. ASTRA наведува дека снимки од очевидци објавени утрово покажале експлозии и пожар во објектот.
Складиштето Ногинск се користи за складирање и претовар на лесни нафтени деривати, меѓу кои бензин, дизел и керозин.
Според достапните податоци, објектот има 24 резервоари со вкупен капацитет од 11.500 кубни метри и претставува важен логистички јазол за снабдување со гориво во Московската област.
