Студено ви е и покрај греењето? Проверете ги овие седум скриени места во домот

Иако најчесто ги проверуваме прозорците и вратите, студениот воздух често влегува низ места на кои воопшто не помислуваме. Промаја во домот прави просториите да бидат непријатно ладни дури и кога греењето работи. Многу од проблемите може да се решат евтино и без поголеми градежни зафати.

Со доаѓањето на зимата, одржувањето пријатна топлина во домот станува вистински предизвик, особено ако сакаме сметките за греење да не растат непотребно. Најмногу внимание обично им посветуваме на прозорците, влезната врата и изолацијата, но една од најчесто занемарените причини за губење топлина се ситните пукнатини и отвори низ кои студениот воздух незабележливо влегува во просториите. Поради промаја во домот, станот може да биде ладен дури и кога греењето е вклучено, а системот за греење троши дополнителна енергија за да ја одржи саканата температура.

Колку ваквите ситни недостатоци влијаат на потрошувачката покажуваат проценките на британската организација Energy Saving Trust. Според нив, спречувањето на промајата околу прозорците, подовите и вратите во Велика Британија може годишно да заштеди околу 55 фунти, а затворањето на оџак што не се користи уште 45 фунти. Овие бројки не можат директно да се пренесат кај нас, бидејќи заштедата зависи од големината и квалитетот на објектот, видот на греењето и цената на енергијата. Сепак, принципот е ист насекаде. Според општите препораки за енергетска ефикасност, намалувањето на температурата за само еден степен може да донесе околу пет отсто заштеда на енергијата за греење, а во просторија без промаја пријатно е и на малку пониска температура.

Првото место што вреди да се провери се дрвените подови, особено во постарите куќи, каде што со годините меѓу штиците се појавуваат пукнатини. Не мора да се менува целиот под. Доволно е празнините да се пополнат со посебни ленти за заптивање или со флексибилна маса што се прилагодува на природното ширење и собирање на дрвото. Килим преку голите штици дополнително го намалува чувството на студ под нозете.

Слаба точка е и секое место каде што цевка или кабел минува низ ѕид или под. Овие отвори често остануваат делумно отворени по монтажата, особено ако водат кон подрум, гаража, таван или надворешен ѕид. Помалите празнини може да се затворат со силиконски заптивач, а поголемите со полиуретанска пена, но никогаш не смеат да се затвораат отворите што имаат функција за вентилација.

Оџакот што не се користи е директна врска меѓу внатрешноста и надворешноста, низ која топлиот воздух излегува, а студениот влегува. За тоа постојат посебни вметоци и балони за оџаци, но оџак што е поврзан со печка, котел или друг уред за греење никогаш не смее да се затвора со импровизирани решенија. Секој ваков зафат претходно треба да се договори со овластен оџачар.

Често заборавен е и капакот на отворот за таванот. Ако не належнува добро на рамката, студениот воздух од негреаниот таван влегува во домот, а решението е евтино: самолепливи ленти за заптивање околу рамката. Слично важи и за подните лајсни, каде што поради движењето на материјалите се појавуваат ситни пукнатини, кои лесно се пополнуваат со флексибилна акрилна маса.

Студ може да влегува и низ клучалката или низ отворот за пошта на постарите влезни врати, а помага едноставен заштитен капак или четкест заптивач. Последното место се вентилаторите во бањата и кујната. Ако ладен воздух влегува и кога се исклучени, најверојатно неповратниот капак е оштетен или заглавен, па треба да се замени тој или целиот вентилатор.


Спречувањето на промајата не значи целосно затворање на просторот. Правилната вентилација останува неопходна за здрава клима во домот, за отстранување на вишокот влага и за безбедна работа на уредите за греење, особено оние на гас. Целта е да не губиме топлина без потреба, а токму малите промени често се првиот чекор кон потопол и поефикасен дом.

е-Трн да боцка во твојот инбокс