Шпанија прогласи вонредна состојба поради шумските пожари што се закануваат на подрачјето на Мадрид, додека Франција бара помош од Европската Унија, а Италија се бори со пожарите низ Сицилија.

Бројни шумски пожари продолжуваат да се шират низ јужна Европа, а евакуациите веќе се во тек во Франција, Шпанија и Италија, бидејќи властите се борат да ги спречат пожарите, кои се поттикнуваат од високите температури и силните ветрови, објави „Еуроњуз“.

Властите во петокот наутро соопштија дека пожарите во градовите Вила дел Прадо и Сан Мартин де Валдеиглесијас, западно од Мадрид, сè уште се „надвор од контрола“, иако службите за итни случаи успеаја донекаде да го ограничат нивното ширење во последните неколку часа.

Илјадници луѓе беа евакуирани од загрозената област.

Во исто време, метеоролозите предвидуваат дека температурите во некои делови од Шпанија ќе достигнат до 44 степени Целзиусови во петок.

Шпанија прогласи вонредна состојба поради пожари што им се закануваат на населбите во близина на главниот град Мадрид и покраината Авила.