Централната команда на САД (CENTCOM) објави дека 13-тиот круг напади врз Иран биле насочени кон воени командни центри, објекти за складирање беспилотни летала, комуникациски мрежи и крајбрежни позиции, со цел, како што се вели, да се намалат заканите на Исламската револуционерна гарда (IRGC) за комерцијалниот превоз.
Иран повторно изврши напади со ракети и беспилотни летала врз Бахреин и Јордан. Техеран тврди дека целите биле американски воени бази, како и резервоари за гориво, хангари и воени објекти во Бахреин, додека Револуционерната гарда тврди дека бил уништен и центар за податоци на Амазон, за кој тврди дека ѝ служел на американската војска. Јорданската војска соопшти дека пресретнала седум ракети и шест беспилотни летала.
Според иранското Министерство за здравство, 55 лица се убиени, а 645 повредени во американските напади во последните денови.
Американскиот претседател Доналд Трамп изјави дека не верува оти Кина или Русија интервенирале во конфликтот, но предупреди дека тоа ќе биде „многу лошо за нив“ . Иранскиот министер за надворешни работи, Абас Аракчи, изјави дека Техеран нема да толерира закани ниту да им биде потчинет на САД.
Трамп посочи дека Вашингтон моментално преговара со Иран за прекин на војната и оцени дека Техеран станува „сè посериозен“ во разговорите, но нагласи дека сè уште не е донесена одлука за можни големи американски воени напади.
Според него, САД имаат две опции – продолжување на нападот и уништување на иранските капацитети или постигнување договор преку преговори.
Според порталот „Аксиос“ , САД и Велика Британија планираат состанок во Лондон следната недела за формирање меѓународна коалиција за заштита на превозот низ Ормутскиот теснец, со можно распоредување на воени бродови, миничистачи и беспилотни летала.
Четворица Палестинци и еден Израелец беа убиени, а неколку други беа ранети на окупираниот Западен Брег. Палестинските власти ги обвинија израелските доселеници и безбедносните сили за нападот во близина на селото Тел, додека Израел соопшти дека Палестинецот отворил оган врз цивили и подоцна бил убиен. Израелската војска најави засилување во областа.
