Осум припадници на српската Управа за криминалистичка полиција се уапсени во врска со смртта на Драгијевиќ во полициската станица во Бор на 7 април 2024 година. Далибор Драгијевиќ бил задржан во рамките на истрагата за исчезнувањето на двегодишната Данка Илиќ.

Според информациите од Вишото јавно обвинителство во Ниш, пренесени од „Вечер“, апсењата ги спровел Секторот за внатрешна контрола на српското МВР, по налог на обвинител.

Седуммина од осомничените се од Белград, а еден е од Нова Пазова. Им е одредено задржување до 48 часа, по што треба да бидат изведени пред обвинител за сослушување.

Истрага за смртта на Драгијевиќ и постапувањето на полицијата

Полицајците се осомничени дека како соизвршители сториле тешка телесна повреда со смртен исход, во врска со злоставување и мачење. Нивната кривична одговорност допрва треба да се утврдува во постапката.

Далибор бил брат на Дејан Драгијевиќ, обвинет во случајот со Данка Илиќ. Девојчето исчезна на 26 март 2024 година во Бањско Поље.

„Вечер“ пренесува и претходни сознанија на српскиот неделник „Радар“, според кои полициските искази за состојбата на Далибор не се совпаѓале со судскомедицинските наоди. Според неделникот, полицајците не навеле дека забележале повреди, додека лекарите утврдиле повеќекратни повреди по неговото тело.

Апсењата се однесуваат на постапувањето со Далибор за време на неговото задржување и на околностите под кои починал во службените простории на полицијата.