Словенечкиот судија Славко Винчиќ е одреден за главен судија на финалето на Светското првенство меѓу Шпанија и Аргентина.

Одлуката му ја соопштил претседателот на судиската комисија на ФИФА, Пјерлуиџи Колина, а 46-годишниот Словенец не можел да ги сокрие емоциите откако дознал дека ќе го суди најголемиот натпревар во својата кариера.

Финалето ќе се игра на стадионот „Мет Лајф“ во Њујорк, а на Винчиќ ќе му помагаат сонародниците Томаж Кланчник и Андраж Ковачиќ.

Колку ќе заработи Винчиќ за финалето?

Покрај спортската чест, судењето на финалето носи и значителен финансиски надомест.

Според словенечко „Дело“, главниот судија на финалето би требало за тој натпревар да заработи околу 60.000 американски долари.

Се проценува дека вкупната заработка на Винчиќ од целиот турнир би можела да достигне околу 140.000 долари, иако конечната сума зависи од бонусите и од пресметките на ФИФА.

Како се пресметуваат судиските хонорари?

Во проценетата вкупна сума влегува фиксна исплата од 70.000 долари за самото учество на Светското првенство.

На тоа се додаваат хонорари по натпревар. Во групната фаза тие изнесувале околу 3.000 долари по меч, додека во нокаут-фазата биле нешто повисоки од 5.000 долари.

Сепак, треба да се напомене дека ФИФА официјално не ги објавила овие податоци за судиските примања.

Кој е Славко Винчиќ?

Винчиќ е искусен судија кој веќе има водено голем број значајни натпревари во европскиот и меѓународниот фудбал.

Судеше на Европското првенство во 2020 година, а во 2022 година го водеше финалето на Лига Европа меѓу Ајнтрахт Франкфурт и Ренџерс.

Две години подоцна беше главен судија и на финалето на Лигата на шампионите меѓу Борусија Дортмунд и Реал Мадрид.

Винчиќ судеше и на Европското првенство во 2024 година, меѓу другото и полуфиналето меѓу Франција и Шпанија.

Минатата година судеше и на Светското клупско првенство во САД. Ова му е второ Светско првенство. На Мундијалот во Катар во 2022 година водеше два натпревари, а на актуелниот турнир ги судеше Бразил – Мароко и Јордан – Алжир во групната фаза, како и Мексико – Еквадор во шеснаесетфиналето.

Со финалето меѓу Шпанија и Аргентина, Винчиќ ја добива најголемата судиска задача во својата кариера.