Голем пожар избувна претпладнево во магацин за складирање опасни материи во белградската општина Барајево. Секторот за вонредни состојби при Министерството за внатрешни работи на Србија испрати итно предупредување до локалното население да остане во своите домови и да ги затвори прозорците за да се спречи труење од чадот. Пожарникарските екипи веќе се на терен и се обидуваат да го локализираат огнот.

Инцидентот се случил во објект на улицата „Живка Стевановиќ Жикица“ број 72 на подрачјето на градската општина Барајево. Според официјалниот систем за предупредување на српското МВР, пожарот започнал во 10 часот и 50 минути.

Складиштето содржи материи со висок степен на ризик. Поради составот на материјалите што горат, над населбата се формира густ чад, што наложи итно активирање на протоколите за заштита на цивилното население.

Секторот за вонредни состојби апелираше до сите жители од непосредната околина целосно да го избегнуваат престојот на отворен простор додека трае интервенцијата. Домовите мора да останат затворени.

Од институцијата посочуваат дека граѓаните можат да ги следат сите понатамошни безбедносни упатства преку специјализираниот владин сервис за вонредни состојби. Засега нема информации за евентуални повредени лица или за точните причини кои довеле до запалување на магацинот.