Црни денови на светските берзи: исчезнаа речиси 9.000 милијарди долари

Светските берзи бележат силен пад, а од августовскиот врв исчезнаа речиси 9.000 милијарди долари пазарна вредност. Најтешко се погодени азиските пазари, кои ја имаа најлошата недела од 2020 година. Вложувачите се сомневаат дали огромните инвестиции во вештачката интелигенција ќе се исплатат.

Светските берзи бележат силен пад. Од августовскиот врв се избришани речиси 9.000 милијарди долари пазарна вредност на акциите, објави агенцијата Ројтерс. Распродажбата ја поттикнуваат сè поголемите сомнежи дали огромните вложувања во вештачката интелигенција се одржливи, како и очекувањата за ново зголемување на американските каматни стапки.

Најтешко се погодени азиските пазари, кои ја имаа најлошата недела од 2020 година. Тајванските акции изгубија околу 17 отсто од вредноста за само пет дена, што е нивниот најголем неделен пад од почетокот на деведесеттите години. Од рекордното ниво на 6 октомври, тајванскиот пазар изгубил околу 1.120 милијарди долари пазарна капитализација.

Јапонскиот индекс „Никеи“ во петокот падна за повеќе од четири отсто, а исто толку изгуби и јужнокорејскиот „Коспи“. Распродажбата се прошири и на европските берзи, каде што паневропскиот индекс „СТОКС 600“ во текот на претпладнето падна за 1,5 отсто.

Силен пад имаше и на Волстрит. Американскиот индекс „С&П 500“ во четвртокот изгуби два отсто, шести ден по ред во минус, што е најдолгата ваква серија од 2024 година. „Дау Џонс“ потона за 1.101 поен, односно 2,2 отсто, а технолошкиот „Насдак“ изгуби 2,3 отсто. Падот продолжи и во петокот, кога на отворањето „С&П 500“ беше во минус околу 0,5 отсто, а „Насдак“ околу 1,3 отсто.

Главната причина е стравот дека цените на технолошките акции, поттикнати од оптимизмот околу вештачката интелигенција, пораснале многу повеќе отколку што оправдуваат вистинските деловни резултати на компаниите. Во последните години вложувачите вложија огромни суми во производителите на чипови, податочните центри и другите компании поврзани со вештачката интелигенција. Сега сè почесто се поставува прашањето дали тие вложувања ќе ја донесат очекуваната заработка.

Довербата дополнително ја нарушија промените во раководството на „Нвидија“ по заминувањето на долгогодишниот извршен директор, загриженоста поради задолжувањето на технолошките компании и отпорот кон градењето нови податочни центри.

Падот не го запре ни историското влегување на американската компанија „Антропик“, која ја развива вештачката интелигенција „Клод“, на берзата. Компанијата во четвртокот собра околу 81 милијарда долари, во најголемата иницијална јавна понуда на акции во историјата. Нејзините акции првиот ден пораснаа околу 17 отсто во однос на почетната цена, но воодушевувањето не се пренесе на остатокот од технолошкиот сектор.

Дополнителен притисок се очекувањата дека американската централна банка повторно ќе ги зголеми каматните стапки. Повисоките камати го поскапуваат задолжувањето и ги прават поризичните вложувања, особено технолошките акции, помалку привлечни.

Распродажбата веќе се прошири и на други пазари. Под притисок се најдоа цените на златото и бакарот, а вложувачите дел од парите ги префрлија во американски државни обврзници. Аналитичарите предупредуваат дека проблемите може да се продлабочат ако падот на технолошките акции предизвика пошироко распродавање на финансиски средства.


И покрај загубите, светските берзи сè уште се во плус во однос на почетокот на годината. Но последните падови покажуваат дека довербата во понатамошниот раст на технолошкиот сектор е сериозно разнишана.

е-Трн да боцка во твојот инбокс