Начинот на возење има пресудно влијание врз тоа колку често автомобилот застанува на бензинска пумпа. Со неколку едноставни навики зад воланот, особено при подолги патувања, може да се постигне значително помала потрошувачка на гориво без да се жртвува динамиката на патувањето.

Кај возилата со рачен менувач, еден од основните совети е префрлање во повисок степен на пренос што е можно порано, додека во пониска брзина треба да се префрла подоцна. За постигнување помала потрошувачка на гориво, стручњаците препорачуваат менување на брзината веќе при околу 1.000 обртаи во минута, односно непосредно пред моторот да почне да покажува знаци на оптоварување или тресење.

Како најекономичен опсег за работа на моторот се издвојува зоната меѓу 1.500 и 2.500 обртаи во минута. Во овој опсег автомобилот работи со оптимално искористување на енергијата и релативно мало оптоварување на погонскиот систем.

Како да постигнете помала потрошувачка на гориво на автопат?

При возење на автопат важат посебни правила, за кои ориентација дава германската стручна организација ТИВ (TÜV). Според нивните препораки, најдобро е да се вози со брзина која одговара на 70 до 80 проценти од максималната брзина што може да ја развие автомобилот, секако со почитување на законското ограничување од 130 километри на час.

Ова правило е особено применливо кај помалите и послаби возила. На пример, доколку еден автомобил има максимална брзина од 150 километри на час, најекономичното темпо за возење на автопат ќе биде меѓу 105 и 120 километри на час.

Крајниот резултат не зависи исклучиво од брзината. Врз трошокот удел имаат и вкупната тежина на возилото, притисокот во гумите, состојбата на патот, временските услови и начинот на притискање на гаста. Сепак, умереното забрзување и рамномерната брзина остануваат најлесниот начин за заштеда.