На Западниот Брег и во Деир ел-Балах се одржуваат локални избори за градоначалници и советници, во услови на војна, ограничен избор и длабоко политичко разочарување.
Палестинците на Западниот Брег и во дел од Појасот Газа во сабота гласаат на локални избори, први од почетокот на војната во Газа. Гласачите избираат градоначалници и членови на општински совети, во услови на ограничен политички избор и широко распространето разочарување.
Според Централната изборна комисија со седиште во Рамала, речиси 1,5 милиони луѓе се регистрирани за гласање на окупираниот Западен Брег, а околу 70.000 во областа Деир ел-Балах, во централниот дел на Појасот Газа.
Повеќето изборни листи се поврзани или блиски до Фатах, националистичката и секуларна партија на палестинскиот претседател Махмуд Абас. Ниту една од листите не тврди дека е поврзана со Хамас, исламистичкиот ривал на Фатах, кој контролира делови од Газа.
Во Тулкарм, на северот на Западниот Брег, дел од гласачите велат дека ќе излезат на избори, но без големи очекувања. Бизнисменот Махмуд Бадер за АФП изјави дека кандидатите, без разлика дали се независни или партиски, нема да можат суштински да ја променат состојбата во градот.
„Тулкарм е управувана од окупацијата“, рече тој, посочувајќи дека Израел повеќе од една година контролира два соседни бегалски кампа.
Во некои од поголемите градови, меѓу кои Наблус и Рамала, се кандидира само една листа на кандидати. Избирачките места на Западниот Брег ќе бидат отворени од 7 до 19 часот, додека во Деир ел-Балах ќе се затворат во 17 часот по локално време, за да може пребројувањето да заврши во истиот ден поради недостиг на електрична енергија.
Заменик-специјалниот координатор на ОН за мировниот процес на Блискиот Исток, Рамиз Алакбаров, го поздрави одржувањето на изборите, оценувајќи дека тие се важна можност Палестинците да ги остварат своите демократски права во особено тешко време.
Во Газа, каде Хамас е на власт од 2007 година, ова се први избори од парламентарните избори во 2006 година. Според политикологот Џамал ал-Фади од Универзитетот Ал-Азхар во Каиро, Палестинската самоуправа ги организира изборите во Деир ел-Балах како тест за тоа дали процесот може да успее по прекинот на огнот во октомври 2025 година.
Деир ел-Балах е и едно од ретките места во Појасот Газа каде населението не е масовно раселено од војната, по двегодишните израелски напади што ја опустошија територијата.
Махмуд Абас, кој има 90 години, е на власт од изборите во 2005 година. Неговите најави за одржување претседателски и парламентарни избори досега не се остварија.
Фарах Шаат, жител на Деир ел-Балах, рече дека е среќен што првпат гласа на 25-годишна возраст. За него, изборите се „потврда за нашето континуирано присуство во Појасот Газа и покрај сè“.
Изборната комисија соопшти дека ангажирала приватна компанија за обезбедување на избирачките места во Газа. Сепак, извор од комисијата за Газа, кој зборувал анонимно, тврди дека полицијата на Хамас инсистирала да ја обезбедува безбедноста на изборниот процес во Деир ел-Балах, преку невооружен персонал во цивилна облека околу гласачките места.
