Претседателот на Никарагва, Даниел Ортега, во неделата, во говор во Манагва по повод 47-годишнината од сандинистичката револуција, ги укина идните избори во земјата. Тој порача дека опозицијата, која ја обвини за поддршка од САД, нема повеќе шанса да дојде на власт преку гласање.

Ортега, кој е на власт непрекинато од 2007 година, го соопшти укинувањето на изборите за време на прославата на 47-годишнината од сандинистичката револуција од 1979 година, во која самиот учествувал во соборувањето на диктаторот Анастасио Сомоза.

„Нема повеќе да има избори тука преку кои би се обиделе да ја заземат власта”, изјавил тој, пренесува Ројтерс. Тој додал дека „деновите кога партии поддржани од Јанките се враќаа на власт, се минато, никогаш повеќе.”

Според Салвадор Маренко, координатор на организацијата за човекови права „Nicaragua Nunca Más” со седиште во Костарика, Ортега веќе ја уништил конкуренцијата во претходните изборни циклуси во 2011, 2016 и 2021 година. Според неговата оцена, потегот цели да го избегне ризикот од изборен пораз, бидејќи Ортега знае дека дел од граѓаните сакаат негова смена.

Владиниот парламент во јануари 2025 година го продолжи петгодишниот претседателски мандат за уште една година, со што следните избори требаше да се одржат во ноември 2027 година. Со најновата изјава, тој термин фактички е поништен. Ортега не даде детали како технички ќе биде спроведено укинувањето.

Минатата година, преку уставни реформи, во земјата беше воспоставен еднопартиски систем, откако лидерите на опозицијата беа протерани. Последните избори во 2021 година беа широко оспорени, откако властите притворија опоненти и деловни лидери. Соединетите Американски Држави не ја признаваат претседателската функција на Ортега, а администрацијата на Трамп ја опиша власта на Ортега и Муриљо како диктатура, и воведе санкции против членови на владата.