Од 15 ноември почнува периодот на задолжително поседување зимска опрема за возилата што учествуваат во сообраќајот. Обврската трае до 15 март, а потребната опрема зависи од масата и од погонот на возилото.

Како што потсетува „Ипортал“, за возилата со најголема дозволена маса до 3.500 килограми се предвидени две можности. Првата е зимски гуми на сите четири тркала, со минимална длабочина на шарата од четири милиметри. Втората е летни гуми на сите четири тркала со шара од најмалку четири милиметри, под услов во возилото да има синџири со соодветна големина за погонските тркала или други соодветни помагала.

Кај возилата со погон на сите четири тркала, зимските гуми треба да имаат шара длабока најмалку шест милиметри. Ако се користат летни гуми, потребни се најмалку четири милиметри шара и соодветни синџири. За постојан погон, синџирите треба да одговараат најмалку на задната осовина, а за преклоплив погон, на осовината што е постојано вклучена.

За возилата над 3.500 килограми се предвидени зимски гуми на погонските тркала со најмалку шест милиметри шара. Дозволени се и летни гуми со најмалку четири милиметри шара, со соодветни синџири или други помагала. Автобусите и товарните возила кај кои технички не можат да се постават синџири треба да имаат зимски гуми на погонските тркала и лопата.

Според правилникот, зимските гуми се препознаваат по ознаките „MS“, „M+S“, „M&S“ и симболот на снегулка во стилизирана планина со три врва. Употребата на гуми со клинци во патниот сообраќај е забранета.