Ново научно истражување укажува дека лековите од типот GLP-1, кои се користат за дијабетес и намалување на телесната тежина, како што се „Оземпик“ и „Мунџаро“, може да бидат поврзани со намален ризик од развој на рак на дојка кај жените.

Студијата, претставена на годишниот состанок на Американското здружение за клиничка онкологија, опфатила повеќе од 110.000 жени на возраст од 45 до 80 години. Резултатите покажале дека корисничките на овие лекови имале околу 30% помала веројатност да заболат од рак на дојка, независно од возраста, телесната тежина и други здравствени фактори.

Истражувачите истакнуваат дека GLP-1 лековите не се развиени како терапија против рак, но влијаат на метаболизмот, телесната тежина и воспалителните процеси во организмот, кои се поврзуваат со развојот на малигни заболувања. Сепак, научниците нагласуваат дека станува збор за опсервациска студија која не докажува директна причинско-последична врска, туку само укажува на можна поврзаност која треба дополнително да се истражува.

Дополнително, се посочува дека жените кои ги користат овие лекови почесто посетуваат лекар, што може да влијае на раното откривање на заболувања. Затоа, потребни се понатамошни клинички испитувања за да се потврдат резултатите и да се процени потенцијалот на овие лекови во превенцијата на рак и други болести.