Нови царини на САД од 10 до 12,5 отсто стапија на сила утрово, соопшти Канцеларијата на трговскиот претставник на САД, пренесува Си-Ен-Ен. Мерката погодува десетици трговски партнери, од Европа до Кина и Индија, а се совпаѓа со истекот на речиси универзалната царина од 10 отсто, која Врховниот суд ја прогласи за неуставна.

Десетици трговски партнери на Соединетите Американски Држави, од Европа до Кина и Индија, се соочуваат со нови царини од 10 до 12,5 отсто за стоки извезени во САД. Го соопшти Канцеларијата на трговскиот претставник на САД, пренесува Си-Ен-Ен.

Новите царини стапуваат на сила во моментот кога истекува речиси универзалната царина од 10 отсто, воведена претходно оваа година од претседателот Доналд Трамп. Врховниот суд на САД ја прогласи таа мерка за неуставна.

„Претседателот нема да дозволи неговата трговска политика и пошироките цели да бидат поткопани само затоа што еден инструмент може да биде ограничен со судска наредба или некој друг фактор“, изјавија високи претставници на Белата куќа за новинарите во четврток, на брифинг на кој ги најавија мерките.

Одлуката доаѓа по неколкумесечна истрага на американскиот трговски претставник за наводна принудна работа во производството на стоки извезени во САД, како и по неуспехот на некои земји да ги спречат ваквите практики.

Европската унија ги доведе во прашање новите царини. Шефицата за надворешна политика на ЕУ, Каја Калас, ги нарече „негативно изненадување“ и ги отфрли обвинувањата за принудна работа како неосновани.

Швајцарија, исто така, ги отфрли обвинувањата. Норвешка изјави дека нема планови да возврати со царини за американски стоки.

Претставници на администрацијата изјавија дека од мерката се ослободени различни производи, меѓу кои нафта и гас, како и стоки кои не можат да се произведуваат во САД. За повеќето Американци, промената веројатно нема веднаш да доведе до зголемување на цените, бидејќи во голема мера претставува продолжение на царините што увозниците веќе ги плаќаа.