Монако, втората најмала држава во светот, со години е симбол на луксуз и богатство. Кнежевството, сместено на брегот на Средоземното Море меѓу Франција и морето, е познато по тоа што неговите жители не плаќаат данок на личен доход уште од 1869 година.
Оваа одлука била донесена во период кога приходите од прочуеното казино во Монте Карло биле доволни за финансирање на државата. Денес Монако најголем дел од буџетот го обезбедува преку данокот на додадена вредност, данокот на добивка за компании што работат надвор од земјата, како и од туризмот и пазарот на недвижности.
Сепак, постои исклучок. Француските државјани кои живеат во Монако во најголем дел и понатаму подлежат на францускиот данок на личен доход, согласно билатералниот договор меѓу двете земји.
Иако нема данок на личен доход, животот во Монако е меѓу најскапите во светот. Недвижностите достигнуваат рекордни цени, а за добивање дозвола за престој потребно е да се обезбеди соодветно живеалиште и да се докажат доволни финансиски средства.
Според процените на компаниите што го следат приватното богатство, повеќе од една третина од жителите на Монако се милионери. Поради ограничената територија, државата со години ја проширува својата површина со насипување на морето, а ваквите проекти продолжуваат и денес.
