Нова група од 42 волонтери на американскиот Мировен корпус пристигна во земјава, означувајќи три децении од почетокот на нивната мисија тука. Доброволците од 29-тата генерација ќе поминат две години помагајќи во локалните заедници, пред сè во наставата по англиски јазик и развојот на инклузивното образование. Нивниот ангажман официјално започнува по тримесечниот подготвителен период, во текот на кој ќе ги совладуваат домашните јазици и обичаи.
Волонтерите беа пречекани на аеродромот во Скопје од директорот на Мировниот корпус во Северна Македонија, Дејвид Рисајд.
„Денес одбележуваме значаен јубилеј – славиме 30 години постоење и работа во Северна Македонија и го поздравуваме пристигнувањето на 42 Американци од 29-тата група волонтери на Мировниот корпус кои ќе служат во земјата. Овие 42 Американци ќе бидат распоредени да живеат и работат во заедници низ целата земја. Благодарни сме на соработката што во изминатите 30 години ја добивме од Владата на Северна Македонија, и нашите партнери, со која поддржавме повеќе од 980 наши волонтери да служат овде од 1996 година наваму“, изјави Рисајд.
Тие нема веднаш да почнат со работа во институциите. Во текот на првите три месеци групата има интензивна програма за учење на македонскиот и албанскиот јазик, како и запознавање со животот во градовите и селата. Службата во локалните средини стартува во декември 2026 година.
Главниот фокус на доброволците во следните две години останува образовниот систем. Американците ќе влезат во училниците како наставници по англиски јазик, но дел од нив ќе се посветат на инклузивното образование, проект што треба да им помогне на децата со попреченост полесно да ја следат наставата.
Покрај училишните клупи, дел од тимот ќе работи директно со граѓанските организации и локалната самоуправа. Програмата функционира во директно партнерство со Министерството за образование и наука и Министерството за локална самоуправа.
Со оваа 29-та група, вкупната бројка на американски државјани кои поминале низ програмата од 1996 година наваму се доближува до илјада.
