По победата од 2-1 над Англија, бранителот на титулата Аргентина обезбеди место во финалето на Светското првенство против европскиот шампион Шпанија. Со тоа, фудбалскиот свет ќе добие генерациски дуел меѓу Лионел Меси и Ламин Јамал.

Финалето, кое во недела ќе се игра во Њу Џерси, ќе биде првиот натпревар во кој 39-годишниот аргентински ветеран и 19-годишниот шпански крилен напаѓач ќе играат еден против друг. Но, иако ова ќе биде нивната прва пресметка на теренот, тоа не е нивната прва вистинска средба, пишува „Фокс њуз“.

Историјата на ова необично дуо почнува пред речиси две децении, кога 20-годишниот Меси првпат се сретнал со бебето Јамал за време на промотивна фотосесија во добротворни цели во Барселона.

Фотосесија од 2007 година што денес изгледа како фудбалско пророштво

Кон крајот на 2007 година, на добротворна томбола организирана од шпанскиот спортски весник „Диарио Спорт“ и Детскиот фонд на Обединетите нации, УНИЦЕФ, семејството на Јамал добило место во промотивна фотосесија со младиот Лионел Меси.

Томболата им понудила на локални семејства во Каталонија можност да учествуваат во снимање за промотивен календар со професионални фудбалери на ФК Барселона. Семејството на Ламин Јамал, кој во тоа време имал само шест месеци, освоило едно од местата.

Фотосесијата се одржала во соблекувалната на стадионот „Камп Ноу“. Дваесетгодишниот Лионел Меси, кој тогаш веќе се етаблирал како еден од клучните играчи на Барселона, бил „спарен“ со бебето Ламин Јамал.

Снимањето вклучувало сцена во која Меси го држи Јамал во сина пластична када за бебиња. Во тој момент, тие немале никаква врска освен добротворната томбола, а фотографиите по објавувањето во календарот за 2008 година биле архивирани и речиси заборавени.

„Почетокот на две легенди“

Фотографијата повторно стана вирална откако таткото на Јамал, Мунир Насрауи, ја објави на Инстаграм по Европското првенство во 2024 година, со натписот: „Почетокот на две легенди“.

Речиси 20 години по таа фотосесија, бебето од фотографијата и легендата што го држеше во раце се пред нова средба — овојпат на најголемата фудбалска сцена.

Врската меѓу двајцата спортисти сега оди подалеку од нивната заедничка историја во Барселона. Таа ќе кулминира во финалето на Светското првенство, каде што Меси и Јамал ќе се најдат на спротивни страни, пишува „Фокс њуз“.

На оваа неверојатна приказна ѝ посветија внимание и други светски медиуми, меѓу кои и австралиската „АБЦ њуз“.

Приказната што ја пренесува австралиската „АБЦ њуз“

Годината е 2007. Дваесетгодишната суперѕвезда на Барселона, Лионел Меси, тивко излегува од соблекувалната на играчите на „Камп Ноу“ и влегува во друга просторија веднаш до неа.

Со коса до рамената и бела дуксерка, во неговата појава има нешто речиси библиско — човекот кој подоцна ќе стане веројатно најголемиот фудбалер што играта некогаш го видела.

Меси го внесуваат неговите придружници, фотографот се движи пред него, пробните блицови се активираат, а сите очи се насочени кон аргентинската суперѕвезда.

Очите на Меси, сепак, се насочени кон една млада мајка и нејзиното мало бебе.

Младата мајка, бебето и томболата на УНИЦЕФ

Шејла Ебана тогаш имала само 16 години. Таа е од Екваторска Гвинеја и работела како келнерка во Каталонија кога забременила со Мунир Насрауи, кој е по потекло од Мароко. Подоцна тие се населиле во градот Матаро.

Таму го одгледале своето мало момче, а преку томболата на УНИЦЕФ освоиле можност за фотосесија со Меси на еден од најзначајните фудбалски стадиони во светот.

Тоа мало момче било Ламин Јамал — денес 19-годишното шпанско чудо од дете, кое ќе се соочи со Меси во финалето на Светското првенство на ФИФА.

„Тие се пријавија на томболата за да се фотографираат на ‘Камп Ноу’ со играч на Барселона“, изјави фотографот на Асошиејтед прес, Жоан Монфорт.

„И ја добија томболата.“

„На почетокот дури и не знаеше како да го држи“

Фотосесијата била наменета за календар, а Меси во тој момент, како што раскажува фотографот, немал целосна претстава што треба да прави.

„Меси е прилично интровертен човек, срамежлив е“, рече Монфорт.

„Излегуваше од соблекувалната и одеднаш се најде во друга соблекувална со пластична када полна со вода и бебе во неа.“

„Беше комплицирано. На почетокот дури и не знаеше како да го држи.“

Фотографиите потоа со години биле заборавени, сè додека таткото на Јамал не ги објави на Инстаграм во 2024 година, славејќи го неверојатното деби на својот син на Европското првенство со натписот „почеток на две легенди“.

Монфорт рече дека во времето кога таткото на Јамал ги објавил фотографиите, тој немал поим во кого ќе прерасне бебето од кадата.

„Многу е возбудливо да се биде поврзан со нешто што предизвикало таква сензација“, изјави тој.

„Да ви кажам искрено, тоа е многу убаво чувство.“

Од заборавена фотографија до финале на Светско првенство

Денес, фотографијата на Меси со бебето Јамал има сосема ново значење. Она што во 2007 година било само добротворна фотосесија за календар, речиси две децении подоцна се претвори во една од најневеројатните приказни во светскиот фудбал.

Меси, тогаш млад играч на Барселона кој штотуку го градел својот пат кон фудбалската бесмртност, сега е светски шампион и една од најголемите легенди во историјата на спортот.

Јамал, тогаш шестмесечно бебе во рацете на Меси, денес е една од најголемите ѕвезди на новата генерација и еден од главните адути на Шпанија.

Во недела, нивната приказна ќе добие ново поглавје — не во соблекувална, не во календар, туку во финале на Светското првенство.