Високите температури не само што го прават ова лето едно од најтоплите во Европа, туку го зголемуваат и ризикот од инфекции поврзани со вода, како што се вибриозата, инфекциите на увото, гастроентеритисот и одредени кожни и уринарни инфекции. Во услови на сè подолги и пожешки лета, Европскиот центар за спречување и контрола на болести (ЕЦДЦ) предупредува дека одредени бактерии наоѓаат сè поповолни услови за развој, особено во топлите крајбрежни води со низок солитет. Иако ризикот од инфекција е релативно низок, експертите нагласуваат дека со неколку едноставни мерки на претпазливост може значително да ги намалите шансите за разболување додека разладувањето го барате на плажите, базените или реките.
Според ЕЦДЦ, растот на температурата на водата, во комбинација со климатските промени и зачестените патувања, го менува начинот на кој одредени заразни болести се шират низ Европа. Еден од најистакнатите примери е вибриозата, инфекција предизвикана од бактерии од родот Vibrio, кои природно се појавуваат во крајбрежните води за време на најтоплите месеци. Овие бактерии посебно брзо се размножуваат на места каде што слатката вода се меша со солена, како и кај суровите или недоволно термички обработените морски плодови, особено кај остригите. Некои видови, како Vibrio vulnificus, неформално се нарекуваат и „бактерии што го јадат месото“, бидејќи во исклучително ретки случаи може да предизвикаат тешки инфекции на ткивата. Европската агенција веќе има ажурирано и интерактивна мапа која го прикажува ризикот од инфекција во различни региони во зависност од еколошките услови.
Иако секој може да развие инфекција, од ЕЦДЦ напоменуваат дека најголем ризик од потешки форми на болеста имаат лицата со ослабен имунолошки систем, хронични црнодробни заболувања или други здравствени проблеми. За овие категории граѓани, претпазливоста при капење и консумација на морска храна е од клучно значење.
Повеќето инфекции може многу лесно да се спречат. Главната препорака е да се избегнува влез во вода доколку имате отворени рани, исеченици, гребнатинки или свежи пирсинзи, бидејќи бактериите лесно влегуваат низ оштетената кожа. Ако капењето е неизбежно, раните треба целосно да се заштитат со водоотпорен фластер, а по излегувањето од вода се препорачува нивно темелно испирање со чиста, слатка вода. Дополнително, експертите советуваат избегнување на сурови остриги и други морски плодови, како и нивна целосна термичка обработка. Иако регионите како Балтичкото Море и одредени речни устија во Европа нудат најповолни услови за развој на оваа бактерија, затоплувањето на водите поврзано со глобалните климатски промени постепено ги проширува подрачјата каде што таа може да опстане. Поради тоа, од суштинско значење е следењето на превентивните совети и внимателноста во текот на сите летни месеци.
