Претседателот на Европскиот совет, Антонио Кошта, изјави дека процесот на проширување на Европската Унија повторно добива силен импулс, при што Црна Гора се издвојува како најсериозен кандидат за следна членка. По Самитот ЕУ – Западен Балкан, Кошта нагласи дека иднината на регионот е тесно поврзана со Европската Унија и дека Црна Гора бележи значителен напредок во пристапните преговори.

„Веќе го броиме времето до следното проширување на Унијата. Црна Гора е најнапредната земја во пристапниот процес и постои реална можност да стане следна членка на ЕУ до 2028 година“, изјави Кошта.

Тој додаде дека црногорските институции веќе се во фаза на подготовка за завршната фаза од преговорите со Брисел, што претставува клучен чекор во процесот на европска интеграција. Според Кошта, односите меѓу Европската Унија и Црна Гора во последните две децении претставуваат пример за успешна соработка и постепено усогласување со европските стандарди.

„Она што е постигнато во последните 20 години е навистина импресивно. Тоа покажува дека реформите и посветеноста носат конкретни резултати“, нагласи тој.

Изјавите доаѓаат во период кога Европската Унија настојува да го забрза процесот на проширување кон Западен Балкан, испраќајќи порака дека земјите од регионот имаат јасна европска перспектива, доколку ги исполнат потребните критериуми. Црна Гора со години важи за најнапреден кандидат во процесот на пристапување, а евентуалното членство до 2028 година би претставувало прво проширување на Европската Унија по повеќе од една деценија.