Модниот бренд КОКЕВ одбележа 20 години од своето постоење со јубилејна ревија на Камениот мост во Скопје, настан што ги спои модата, музиката, литературата и архитектурата во една вечер посветена на домашното творештво.

Камениот мост, еден од најпрепознатливите симболи на Скопје, за потребите на ревијата беше претворен во модна писта, а изборот на локацијата имаше и симболично значење – поврзување на досегашниот развој на брендот со неговата следна фаза.

Ревијата ја отвори актерот Никола Ристановски со извадок од романот „Пиреј“ на Петре М. Андреевски, по што следуваше претставувањето на јубилејната колекција. Целата вечер беше придружена исклучиво со македонска музика, како дел од концептот на настанот кој беше насочен кон домашната култура и современата македонска креативна сцена.

Во центарот на ревијата беше колекцијата инспирирана од лебедот, паунот и рисот. Трите животни се избрани како симболи на различни карактеристики – елеганција, индивидуалност и сила, а нивните особености се пренесени преку кроевите, материјалите, текстурите и деталите на моделите.

Од КОКЕВ велат дека јубилејната ревија била замислена како повеќе од класично модно претставување. Идејата била модата да се постави во поширок контекст и да комуницира со македонската музика, литература и културно наследство.

Дваесетгодишнината воедно го означи и почетокот на нова етапа за брендот.По две децении во кои Тања Кокев го создаваше и развиваше препознатливиот визуелен и моден идентитет на КОКЕВ, во студиото како креативна директорка влегува нејзината ќерка Клара Кокев.

Во следниот период Тања и Клара Кокев ќе работат заеднички, со намера да го продолжат досегашниот развој на брендот, но и да внесат нови идеи и современ креативен пристап.Со ова, јубилејот не беше само пресек на изминатите 20 години, туку и најава за генерациска промена и нов правец во развојот на КОКЕВ.

Брендот во изминатите две децении изгради препознатливо место на македонската модна сцена, а јубилејната ревија на Камениот мост беше поставена како заокружување на тој период и отворање на следното поглавје.

Настанот истовремено беше и обид на едно место да се поврзат повеќе форми на домашно творештво – модата, музиката, литературата и архитектурата – со Скопје како централна сценографија на јубилејот.