Иран воведе разговори со Оман за воспоставување заеднички привремен коридор за пловидба во Ормускиот Теснец, потврди портпаролот на иранското Министерство за надворешни работи, Исмаил Багеи. Планот предвидува кружна рута со цел да се регулира поморскиот сообраќај и да се олесни движењето на трговските бродови во услови на зголемени воени и геополитички тензии во овој стратешки регион.

Според информациите што ги пренесе иранската државна новинска агенција ИРНА, предлогот се фокусира на создавање кружна патека за движење на танкерите и товарните бродови. Ваквиот модел треба да обезбеди подобро управување со ризиците и да спречи евентуални инциденти или блокади во еден од најпрометните поморски премини во светот.

Ормускиот Теснец претставува главна артерија за глобалната енергетска безбедност, бидејќи низ него минува значителен дел од светската испорака на нафта, природен гас и вештачки ѓубрива. Со оглед на тоа што спорот околу правото на минување е една од клучните точки на триење во воениот и политичкиот конфликт меѓу САД и Иран, секое преиспитување или промена на правилата за пловидба директно влијае врз стабилноста на светските берзи на енергенси.

Оман традиционално делува како посредник во регионалните спорови на Блискиот Исток, па заедничките преговори со Техеран се обид за наоѓање какво-годе техничко решение за одржување на сообраќајот отворен. За земјите што зависат од увоз на енергенси, вклучително и европските пазари и регионот, секое нарушување на патиштата низ Ормус значи потенцијален скок на цените на горивата и дополнителни трошоци за транспорт.