Остануваат уште неколку недели за пријавување на проектни идеи на платформата „Иднина која инспирира“, преку која компанијата dm drogerie markt поддржува иницијативи насочени кон создавање позитивни промени во заедницата.
Повикот е отворен до 31 јули 2026 година, а можност да аплицираат имаат организации, здруженија, институции, образовни установи и други правни субјекти кои развиваат проекти со општествено значење.
Платформата е создадена со цел да им овозможи на иницијативите кои нудат конкретни решенија за реални предизвици да добијат поддршка и да бидат реализирани. Проектите можат да се однесуваат на различни области, но заедничко за нив е стремежот кон подобрување на квалитетот на животот и развој на заедницата.
Меѓу веќе пријавените идеи е проектот „Нуркачка Еко Патрола“, кој се фокусира на истражување и мапирање на загадувањето со цврст отпад на вливовите на реките во Охридското Езеро. Преку професионални нуркачки активности, подводно снимање и анализа на состојбата, иницијативата има цел да придонесе за подобра заштита на езерскиот екосистем и подигнување на јавната свест за зачувување на природните богатства.
Друга иницијатива е „Women Rise Hub“, проект насочен кон зајакнување на жените преку едукација, дигитални вештини и претприемништво. Со обуки, менторска поддршка и можности за поврзување, проектот има цел да придонесе кон професионален и економски развој на жените.
Во областа на јазичната култура е проектот „Јазичната ризница на Македонија“, кој преку интерактивни содржини, активности во училиштата и градинките и вклучување на различни генерации го промовира богатството на македонскиот јазик и неговото зачувување.
Од dm посочуваат дека овие примери се само дел од пријавените иницијативи и покажуваат дека различни идеи можат да создадат значајни резултати кога се насочени кон потребите на луѓето и заедницата.
Компанијата ги повикува сите организации и институции кои имаат проектни идеи со општествена вредност да ја искористат можноста и да ги пријават своите иницијативи во рамки на платформата „Иднина која инспирира“.
