Силно невреме со обилни врнежи и крупен град ја зафати хрватска Истра, предизвикувајќи штети на автомобили, патишта и земјоделски површини. Метеоролозите предупредуваат дека нестабилното време ќе продолжи и во текот на денот.

Жителите на Ровињ и околните места сведочат дека паѓале парчиња мраз со големина на орев, а дел од автомобилите претрпеле оштетувања. Според локалните жители, ваква силна градушка не се памети подолго време во регионот.

Државниот хидрометеоролошки завод на Хрватска издаде портокалово предупредување за Истра поради можни нови силни невремиња. Поради големата количина дожд, на одредени места има проблеми со водата на патиштата и отежнат сообраќај.

Невремето погоди и делови од Далмација, каде што се пријавени оштетувања на возила и земјоделски култури. Метеоролозите најавуваат нови врнежи, грмежи и можност за повторна појава на крупна градушка, а на одделни места не е исклучена ниту појава на силни ветрови.

Граѓаните и туристите во погодените области се советуваат да ги следат временските предупредувања и навреме да се засолнат доколку се приближува ново невреме.