Европската комисија одби да ја регистрира Европската граѓанска иницијатива „Акт за спас на Европа“, која бараше привремен мораториум за нови имигранти од земји надвор од западниот свет. Според Комисијата, предлогот е во спротивност со основните вредности и принципите на Европската Унија.

Организаторите предлагаа ограничувања за визи, спојување на семејства и реформа на европскиот систем за миграција и азил, образложувајќи дека целта е зачувување на „етничкиот и културниот континуитет“ на европските народи. Европската комисија оцени дека таквите критериуми претставуваат дискриминација врз основа на раса и етничко потекло и затоа иницијативата не може да биде регистрирана.

Во исто време, Комисијата ја регистрираше иницијативата „Стоп за убивањето на интернетот: Не за дигитален идентитет и задолжителна проверка на возраста“. Нејзините организатори бараат европско законодавство со кое користењето дигитален идентитет и проверката на возраста при пристап до онлајн услуги ќе останат доброволни, ќе ја штитат приватноста и нема да бидат дискриминаторски.

Европската граѓанска иницијатива постои од 2012 година и им овозможува на најмалку еден милион граѓани од најмалку седум земји членки да побараат Европската комисија да предложи ново законодавство. Самата регистрација на иницијативата не значи и обврска Комисијата да го прифати предложениот закон.