Европа бележи напредок кон целите на Дигиталниот децениум до 2030 година, особено во развојот на сигурна и одржлива дигитална инфраструктура и дигитализацијата на јавните услуги, покажува новиот извештај на Европската комисија за 2026 година. Сепак, и покрај напредокот, многу од клучните цели сè уште се далеку од реализација и бараат побрзо и поеднакво спроведување низ целата Унија.

Според извештајот, 96,8% од домаќинствата во ЕУ имаат пристап до основна 5G мрежа, но напредните висококапацитетни фреквенции и оптичките мрежи до крајните корисници сè уште заостануваат. Во бизнис-секторот, 46,7% од компаниите користат cloud технологии, околу 40% анализи на податоци, а речиси 20% веќе применуваат вештачка интелигенција, при што нејзината употреба бележи раст од 48% во една година.

Над 60% од граѓаните на ЕУ имаат основни дигитални вештини, но Унијата сè уште не ги достигнува целите во клучни области како полупроводници, каде учеството на европскиот пазар е само 9% наспроти целта од 20% до 2030 година. Недостигот на ИКТ кадар останува сериозен проблем, со само 5% од работната сила во оваа област и значително мал удел на жени во секторот.

Извештајот предупредува и на зависноста од странски добавувачи во кибер-безбедноста, како и на пречките со кои се соочуваат малите и средни претпријатија при воведување на нови дигитални технологии.

Истовремено, вештачката интелигенција станува сè поприсутна – околу 40% од граѓаните ја користат неделно, додека 80% сметаат дека треба строго да се регулира. Голем дел од јавноста изразува загриженост за дезинформации, deepfake содржини и злоупотреба на податоци, при што над 90% бараат посилна заштита на децата на интернет.

И покрај напредокот, Европската унија се соочува со јасен јаз меѓу поставените цели и реалната состојба, што го прави периодот до 2030 година клучен за нејзината дигитална трансформација.