Европската комисија му изрече рекордна казна од 550 милиони евра на кинескиот онлајн гигант AliExpress поради прекршување на европскиот Закон за дигитални услуги (DSA). Станува збор за највисока санкција досега изречена според оваа регулатива. 

Истрагата покажала дека платформата не презела доволно мерки за да го спречи продавањето на опасни, небезбедни и фалсификувани производи, меѓу кои играчки, козметика, облека и други артикли што не ги исполнуваат безбедносните стандарди на Европската Унија. Регулаторите утврдиле и дека AliExpress немал доволно ефикасен систем за откривање и отстранување на ваквите производи, како и недоволно ресурси за контрола на продавачите. 

Според Европската комисија, алгоритмите за препораки и рекламирање дополнително придонесувале за поголема видливост на нелегалните производи, додека санкциите против продавачите што ги прекршувале правилата не биле доволно ефикасни. 

Европската комесарка за технолошка политика Хена Виркунен порача дека продажбата на опасни производи преку интернет не смее да се смета за неизбежен дел од онлајн трговијата, туку претставува неисполнување на законските обврски од страна на платформите. 

Од AliExpress соопштија дека не се согласуваат со висината на казната и оценуваат дека таа е непропорционална. Компанијата наведува дека во изминатиот период значително ги подобрила системите за контрола и управување со ризиците и дека ќе ги разгледа сите правни можности.

Компанијата има рок до 20 октомври да достави акциски план со конкретни мерки за усогласување со европските правила. Во спротивно, Европската комисија може да воведе дополнителни санкции. 

Казната за AliExpress доаѓа во период кога Европската Унија значително го засилува надзорот врз големите онлајн платформи. Претходно оваа година беа санкционирани и други компании, меѓу кои Temu и платформата X, поради слични прекршувања на правилата за заштита на потрошувачите и безбедноста на производите.