Демократскиот конгресмен Џејми Раскин покрена истрага за можноста Џефри Епстин да работел како нерегистриран агент за странски држави, пишува CNN.
Раскин побарал од американското Министерство за правда документација за врските на починатиот финансиер и осуден сексуален престапник со странски влади и функционери.
Бидејќи Претставничкиот дом во моментов е под контрола на републиканците, малку е веројатно дека Министерството за правда, Стејт департментот и разузнавачката заедница ќе одговорат на неговите барања. Сепак, потегот се толкува како најава за можни истраги што демократите би ги отвориле доколку освојат мнозинство на следните избори.
Раскин тврди дека има „цврсти докази“
Во писмо испратено до институциите, Раскин наведува дека се повикува на документи што претходно ги објавиле Министерството за правда и Одборот за надзор на Претставничкиот дом.
Тој тврди дека пронашол „цврсти докази“ дека Епстин промовирал интереси на владите на Саудиска Арабија и Кувајт, ја советувал руската влада и работел како консултант за поранешен израелски премиер.
Раскин предупредува и на можни безбедносни ризици поврзани со странските контакти на Епстин, посочувајќи дека тој никогаш не бил регистриран како странски агент.
„Нашата анализа на достапните докази веќе откри компромитирачки индиции дека господин Епстин работел за странски држави“, напиша Раскин.
Се бараат милиони необјавени документи
Раскин смета дека дополнителни информации за странските врски на Џефри Епстин може да се наоѓаат во околу 2,5 милиони документи што Министерството за правда сè уште не ги објавило.
Затоа тој бара увид во сите записи поврзани со комуникацијата на Епстин со странски функционери.
Дополнително, од Министерството за правда бара писмен одговор дали некогаш била спроведена истрага за тоа дали Епстин дејствувал како странски агент.
„И покрај обемните и добро документирани лични и деловни контакти со функционери на странски влади, господин Епстин никогаш не се регистрирал како странски агент“, напиша Раскин.
Доколку демократите повторно добијат мнозинство во Конгресот, ова прашање би можело да стане дел од поширока истрага за меѓународните врски на Епстин и потенцијалните безбедносни последици од тие контакти.
