Диме Меловски, конзервацискиот биолог од Македонското еколошко друштво (МЕД), истакна дека паркот има клучна улога не само за урбаната биодиверзност, туку и како место за спорт и рекреација за жителите. „Јас би кажал дека е доста важен, не само што поседува уникатни вредности во однос на одредени животни, туку тој е една од најзначајните дестинации за луѓето. Особено во есен и пролет, кога временските услови се идеални за рекреација, паркот е место каде што граѓаните можат да го искористат за своето здравје и уживање“.
Експериментално засадени од Шумарскиот факултет, дрвјата во Градскиот парк вклучуваат видови специфични за подрачјето, но и оние кои се донесени за да се утврди нивната адаптација во оваа средина. Паркот, исто така, претставува дом за бројни видови животни, вклучувајќи цицачи, птици, влекачи, водоземци и риби, што дополнително ја потврдува неговата важност како еколошка зона во срцето на градот.
„Паркот е не само место за релаксација, туку и еден вид заштитен екосистем кој треба да го чуваме и негуваме,“ додава Меловски, апелирајќи до граѓаните да внимаваат на чистотата и да се однесуваат одговорно кон ова природно богатство. „Заштитата на природата е наша одговорност за идните генерации. Само со внимателен однос можеме да го зачуваме овој украс на урбаното Скопје.“
Со оглед на неговата биолошка и рекреативна важност, Градскиот парк останува еден од најзначајните природни простори во Скопје, кој секојдневно служи како жив пример за хармонијата помеѓу урбаното живеење и природата.
