Корина Шумахер откри интимни детали за Михаел во нов документарец на Нетфликс посветен на неговата прва шампионска титула во Формула 1 од 1994 година. Во филмот, таа споделува лични спомени за нивната заедничка љубовна песна, но и за илјадниците писма што му пристигнувале од обожавателките. Семејството и понатаму строго ја чува приватноста за неговата состојба по тешката скијачка несреќа во 2013 година, што го прави секое ново сведоштво исклучително ретко.

Во документарниот филм „Schumacher ’94: Rođenje legende“, Корина зборува за почетоците на врската со легендарниот германски возач. Како посебно емотивен спомен ја издвои баладата „Rush Rush“ на американската пејачка Пола Абдул.

„Тоа беше нашата песна. Кога денес ќе ја слушнам во автомобилот, плачам сама со себе“, раскажа Корина во филмот.

Таа додаде дека нејзиното срце отсекогаш чукало за него, без оглед на исходот на патеката. „Прекрасно е да си со некого кого со нетрпение чекаш да го видиш секој ден“, изјави таа.

Освен романтичните мигови, сопругата на Шумахер се присети и на огромниот интерес од јавноста што го следеше секој чекор на Германецот во деведесеттите. Меѓу илјадниците писма што редовно пристигнуваа на негова адреса, имало и такви со бизарни пратки.

„Добиваше навистина многу писма. Му пишуваше една девојка која заедно со писмата секогаш му праќаше и долна облека. Се викаше Јута. Во еден момент фразата ‘Ајде, Јута’ стана негова редовна шега и поштапалка“, открива Корина.

Новиот документарец се фокусира на сезоната во која Шумахер ја освои својата прва светска титула со болидот на Бенетон, по судирот со Дејмон Хил на патеката во Аделаида. Во филмот нема нови медицински детали за неговото здравје, кое останува најстрого чувана тајна во светот на спортот.