Густ чад од огромните шумски пожари во Канада ги принуди властите да прогласат аларм за висока загаденост, додека големите американски градови како Детроит, Чикаго и Вашингтон го забележаа најлошиот квалитетот на воздухот во светот. Поради намалената видливост и опасните честички, локалните власти апелираа до граѓаните да ги избегнуваат активностите на отворено, додека политичките тензии меѓу двете соседни држави растат.
Податоците од платформата „IQ Air“ покажуваат дека индексот на квалитетот на воздухот во Детроит достигна опасни 435, во Чикаго 330, а во главниот град Вашингтон 242. Овие вредности ја надминаа загаденоста во светските метрополи познати по траен смог, како Џакарта, Њу Делхи и Пекинг. Густ чад ги покри препознатливите споменици Линколн и Вашингтон во Вирџинија, а жителите на Њујорк и Бостон пријавуваат остар мирис и вкус на чад во воздухот.
Како споредба, индекс на аерозагадување над 300, каков што деновиве со денови го дишат Чикаго и Детроит, во Скопје се регистрира речиси исклучиво во деновите со екстремно зимско аерозагадување под влијание на температурна инверзија, што покажува дека летните шумски пожари во Северна Америка создадоа еколошка криза од идентични размери.
Главниот извор на загадувањето се активните шумски пожари во канадските провинции Онтарио и Квебек, како и во американската сојузна држава Минесота. Експертите кои ги анализираат овие појави објаснуваат дека од 2015 година, под директно влијание на климатските промени, пожарите сè почесто се шират на источниот дел од земјата. Поради долготрајните суши, тлото многу полесно се запалува. Тоа резултираше со преку 890 активни пожари во Канада, од кои повеќето се надвор од контрола и веќе пеплосаа речиси три милиони хектари земјиште.
Ситуацијата предизвика остар револт кај четири републикански пратеници од Мичиген, кои преку заедничко писмо до канадскиот премиер побараа итна акција. Џон Џејмс, Џон Муленар, Џек Бергман и Лиза Меклејн ја обвинија Канада за пасивност и недоволно инвестирање во уредување на шумите и контролирано палење.
Премиерот на Онтарио, Даг Форд, веднаш возврати на критиките, порачувајќи им на американските политичари да испратат конкретна помош наместо само да се жалат. Форд нагласи дека Канада со години помагала при катастрофи во САД и дека на терен во моментов се ангажирани сите расположливи ресурси, вклучувајќи 150 противпожарни екипи и над 80 канадски авиони и хеликоптери.
