Лондон денеска е центарот на европската дипломатија поврзана со војната во Украина. Украинскиот претседател Володимир Зеленски се среќава со британскиот премиер Кир Стармер, францускиот претседател Емануел Макрон и германскиот канцелар Фридрих Мерц, во обид да обезбеди дополнителна поддршка за Киев и да ја зајакне координацијата меѓу европските сојузници.

Разговорите во Даунинг стрит се фокусирани на идната воена, финансиска и политичка поддршка за Украина, како и на можностите за засилување на притисокот врз Русија. Средбата се одржува во момент кога украинските власти објавија нови информации за инцидент во близина на нуклеарната централа Чернобил. Зеленски соопшти дека руски напад предизвикал пожар на дел од инфраструктурата, кој во меѓувреме бил изгаснат.

„Станува збор за исклучително важен инфраструктурен објект и за намерен напад врз нуклеарна инфраструктура. Засега нема измерени нивоа на радијација над дозволените граници“, напиша Зеленски на социјалната мрежа X.

Тој исто така објави дека Русија во текот на ноќта извршила напади врз 13 украински региони, при што биле погодени и цивилни цели. Според украинскиот претседател, во изминатата недела Русија лансирала 88 ракети, повеќе од 3.250 беспилотни летала и околу 1.800 наведувани воздушни бомби.

Пред состанокот во Лондон, од Елисејската палата порачаа дека целта е продолжување на тесната координација меѓу европските партнери и понатамошно зајакнување на поддршката за Украина.

„Русија се соочува со воени, економски и стратешки неуспеси, а оваа средба ќе помогне во усогласувањето на заедничките чекори за поддршка на Украина“, се наведува во соопштението.

Лондонските разговори следуваат и по неодамнешниот украински напад со беспилотни летала врз Санкт Петербург, кој Киев го претстави како доказ дека може да погодува цели длабоко во руската територија. Во меѓувреме, Москва го отфрли предлогот на Зеленски за директна средба со рускиот претседател Владимир Путин, оценувајќи дека во моментов не постојат услови за такви разговори. Велика Британија, Франција и Германија остануваат меѓу најважните европски поддржувачи на Украина, а денешната средба во Лондон се смета за клучна во обликувањето на идната европска стратегија во услови на продолжен конфликт.