Говорејќи во холандскиот Миделбург, Зеленски рече дека за Киев е од суштинско значење да продолжи испораката на клучните системи, особено во момент кога Украина и натаму зависи од западната воена поддршка за одбрана од руските напади. Неговата изјава доаѓа во време кога во Вашингтон повторно се отвора прашањето колку долго и со каков интензитет САД ќе продолжат да го поддржуваат украинскиот отпор.
Зеленски притоа нагласи дека набавките преку механизмот PURL, односно листата на приоритетни украински воени потреби, не се финансираат директно од американскиот буџет, туку главно од европски извори, меѓу кои и Холандија. Овој механизам е под капата на НАТО, а генералниот секретар Марк Руте деновиве изјави дека Алијансата останува на пат да обезбеди средства за одбранбената помош за Украина до крајот на годината, иако призна дека товарот не е рамномерно распределен меѓу сојузниците.
Според Зеленски, евентуален прекин на програмата не би бил удар само за Украина, туку и за односите меѓу САД и Европа. Тој порача дека поддршката за Киев не е само прашање на оружје, туку и на политичко единство меѓу западните партнери.
Во исто време, украинскиот претседател призна дека новите тензии на Блискиот Исток може дополнително да го искомплицираат обезбедувањето средства и вниманието на западните сојузници. Тоа е уште еден сигнал дека Украина стравува оти глобалните кризи постепено ја туркаат во втор план, токму во период кога ѝ е потребна стабилна и предвидлива поддршка.
Изјавата на Зеленски следува по пораките на Џеј Ди Венс, кој во американската јавност се пофали со драстичното намалување на испораките на американско оружје за Украина. Таквата позиција дополнително ги зголеми сомнежите во Киев дека дел од поддршката што досега изгледаше сигурна, во наредниот период би можела да стане предмет на политичко условување.
