Вашингтон планира да го ограничи увозот на нови кинески роботи и енергетски инвертори, со образложение дека мерката ќе ја зајакне националната безбедност и ќе го заштити развојот на вештачката интелигенција во САД.

Администрацијата на американскиот претседател Доналд Трамп подготвува нови ограничувања за увоз на кинески хуманоидни и четириножни роботи, како и енергетски инвертори, објави „Ројтерс“. Целта е да се намалат потенцијалните безбедносни ризици и да се заштитат клучните технолошки индустрии во САД.

Според најавите, американската Федерална комисија за комуникации (FCC) ќе предложи мерки што ќе го ограничат влезот на нови производи од Кина во овие категории. Американски претставници сметаат дека земјата мора да изгради независни и сигурни синџири на снабдување за критичните технологии.

Официјален Вашингтон изразува загриженост дека дел од кинеската технологија би можела да се користи за собирање чувствителни податоци или за сајбернапади врз важна инфраструктура. Воедно, новите правила треба да поттикнат поголем дел од производството да се пресели во САД.

Меѓу компаниите што би можеле најмногу да бидат погодени е кинескиот производител на хуманоидни роботи Unitree, кој има значително учество на светскиот пазар. Ограничувањата, според „Ројтерс“, ќе се однесуваат само на нови модели кои сè уште немаат дозвола за продажба во САД.