Volkswagen во Полска започна необичен еколошки проект во кој 100 овци се грижат за одржување на вегетацијата под повеќе од 31.000 соларни панели. Иницијативата ги спојува обновливите извори на енергија, заштитата на природата и научните истражувања.

Наместо механичко косење, германскиот автомобилски производител се одлучи за природно решение. Во фабриката во Вжешња, Полска, стадо од 100 овци ја одржува тревата под контрола, овозможувајќи поеколошко и поодржливо управување со една од најголемите индустриски соларни електрани во Европа.

Проектот е реализиран во партнерство со компанијата Quanta Energy и претставува пример за таканаречена агроволтаика – модел кој ја комбинира производството на соларна енергија со сточарството. Соларната централа има инсталиран капацитет од 18,3 мегавати и обезбедува околу една четвртина од годишните потреби за електрична енергија на производствениот погон на Volkswagen.

Овците, кои припаѓаат на автохтоната полска раса Великополска, слободно пасат меѓу повеќе од 31.000 соларни панели. Освен што природно ја одржуваат вегетацијата, тие придонесуваат и за намалување на употребата на механизација, додека панелите им обезбедуваат сенка и заштита од неповолни временски услови.

Во проектот се вклучени и истражувачи од Универзитетот во Познањ, кои го следат влијанието на пасењето врз биолошката разновидност, квалитетот на почвата, микроклимата и благосостојбата на животните. Иницијативата доаѓа во период кога Volkswagen најавува значително намалување на бројот на вработени, што дополнително го привлече вниманието кон овој необичен потег.