Питката вода во рестораните, баровите и хотелите низ Европа не е унифицирано право, туку мозаик од различни национални правила, од целосно бесплатна услуга до целосно наплатување како комерцијален производ. Ова повторно стана актуелна тема по неодамнешна одлука на италијанскиот Врховен суд, кој утврди дека хотелите во Италија не се законски обврзани да нудат вода од чешма на гостите.

Случајот се однесува на луксузен хотел во Доломитите, кој одбил да послужи бесплатна вода од чешма на гостинка што престојувала со пакет-аранжман од неколку илјади евра. Гостинката тврдела дека водата е основно право и дека треба да биде достапна како и сапун или постелнина. Сепак, судот пресуди дека италијанското законодавство не содржи обврска за рестораните и хотелите да нудат бесплатна вода од чешма.

Европа: целосно различни правила

Прашањето за бесплатна вода значително се разликува од држава до држава. Во Шпанија, од 2022 година, сите угостителски објекти се законски обврзани да понудат бесплатна чешмова вода како алтернатива на флаширана вода, со цел намалување на отпадот и поттикнување одржливост. Португалија оди чекор понатаму, таму е забрането да се наплаќа за чаша чешмова вода или да се одбие ако клиент ја побара.

Во Франција постои традиционалната практика на „carafe d’eau“, според која ресторанот мора да понуди бесплатна вода ако клиентот нарача оброк. Во Велика Британија, обврската е поврзана со лиценците за алкохол – сите објекти што служат алкохол мора да понудат и бесплатна вода на барање.

Во Германија, Белгија и Холандија, пак, водата најчесто се третира како комерцијален производ и се наплаќа, понекогаш дури и поскапо од безалкохолни пијалоци или пиво. Иако пристапот до вода е сè почеста тема во контекст на топлотни бранови и јавноздравствени политики, Европа сè уште нема единствено правило. Разликите меѓу државите се големи – од целосна бесплатна услуга до целосна комерцијализација.