Ладните производи кои во летните месеци се меѓу најбараните – сладоледот и мразот – летово беа под засилен инспекциски надзор.

Во текот на јули и август, инспекторите на Агенцијата за храна и ветеринарство спровеле 560 вонредни контроли во објекти каде што се произведуваат сладолед и мраз, но и во угостителски објекти кои сами ги произведуваат и ги ставаат во промет.

Биле издадени 140 решенија за отстранување на утврдените неправилности, а биле изречени и 45 парични казни, во вкупна вредност од околу 19.430 евра.

Најконкретната последица од контролите е дека како небезбедни биле уништени 202 килограми, односно литри сладолед и мраз.

Кај 17 оператори било утврдено дека воопшто не биле регистрирани како оператори со храна.

Дополнителен проблем биле лабораториските проверки. Дури 64 оператори немале направено анализи на сладоледот или мразот, додека кај 20 биле откриени производи со несоодветна декларација.

Во три случаи мразот бил набавуван од нерегистриран добавувач.

Инспекторите утврдиле пропусти и кај персоналот. Во 10 објекти биле затекнати вработени кои немале извршени задолжителни здравствени прегледи.

Хигиената – уште една слаба точка

Во пет објекти биле утврдени незадоволителни хигиенски и технички услови.

Кај 19 оператори немало воспоставени процедури за добра производствена и хигиенска пракса, ниту соодветни процедури за чистење на ледоматите.

Кај четворица оператори недостасувале записи за следливост на производите, а кај еден биле утврдени пропусти во задолжителната дезинфекција, дезинсекција и дератизација.

Од Агенцијата за храна и ветеринарство велат дека засилените контроли биле спроведени во согласност со Законот за безбедност на храната, токму во периодот кога потрошувачката на сладолед и мраз е најголема.

За потрошувачите, бројките се потсетник дека зад навидум обичен сладолед или чаша мраз стојат правила за регистрација, контрола, хигиена и безбедност на храната.