Повеќе од 100 организации во 15 европски земји најавуваат протести за 6 и 7 ноември, предупредувајќи дека технолошкиот напредок може да има висока енергетска и еколошка цена.

Кампањата „Stop Dirty Data Centres“ бара запирање на големите нови проекти додека не се проценат нивните последици врз животната средина и локалните заедници.

Протести се планирани во Варшава, Даблин, Амстердам, Данска и Лондон. Меѓу организациите што ја поддржуваат иницијативата се „Гринпис“ и „Пријатели на Земјата“.

Причината за загриженоста е потрошувачката на електрична енергија потребна за работа на серверите и системите што ги обработуваат огромните количини податоци.

Според истражување на германскиот институт Öko-Institut, цитирано од „Гардијан“, емисиите на јаглерод диоксид од центрите за податоци поврзани со вештачката интелигенција би можеле да бидат шестпати повисоки во 2030 година отколку во 2023 година.

Во Велика Британија, 315 центри за податоци чекаат приклучување на електроенергетската мрежа. Нивната вкупна побарувачка е проценета на 73 гигавати, што е повеќе од досегашната највисока побарувачка на електрична енергија во земјата, наведена на околу 45 гигавати.

Тоа не значи дека сите ќе ја трошат таа количина истовремено, но укажува на обемот на барањата за нови енергетски капацитети.

Технолошката индустрија, од друга страна, тврди дека центрите за податоци отвораат работни места, поттикнуваат инвестиции и го поддржуваат економскиот раст.

Расправата сè повеќе се сведува на едно прашање: кој ќе ја плати енергетската цена на развојот на вештачката интелигенција?