Унгарската државна телевизија ја прекина својата информативна програма како дел од радикалната реорганизација на јавните медиуми со цел да се обезбеди нивна независност. Главниот канал M1 го сопре емитувањето вести во вторникот, објавувајќи црн екран со јавно извинување до граѓаните за долгогодишното ширење невистини. Новиот премиер Петер Маѓар го прогласи овој потег за историски ден и најави итно запирање на државната пропаганда во земјата.
Јавно извинување на црн екран
Прекинот на информативната програма се случи во вторникот попладне, кога главниот државен канал M1 ја замени редовната шема со писмено соопштение на црна позадина. Во пораката, менаџментот директно призна дека медиумот со години не ја говорел вистината.
„Јавните медиуми не смеат да лажат. Ипак, се извинуваме што го правевме тоа долги низа години“, стоеше во објавата на унгарскиот сервис.
Пред исклучувањето на вестите, неколку уредници во државната телевизија и радио биле отпуштени од должност веднаш по пристигнувањето на новото привремено раководство во седиштето на медиумот. Најавено е дека каналот M1 ќе продолжи со емитување, но исклучиво со филмска и забавна програма.
Демонтирање на пропагандната мрежа на Орбан
Оваа одлука доаѓа како директно исполнување на предизборните ветувања на новиот премиер Петер Маѓар, чија партија Тисза (Tisza) победи на изборите во април. Со ова беше прекината 16-годишната доминација на националистичката партија Фидес (Fidesz) на поранешниот премиер Виктор Орбан.
Маѓар потврди дека покрај телевизијата, прекинато е и информативното емитување на државното радио Кошут (Kossuth). Тој нагласи дека ова е почеток на темелна реконструкција на клучните упоришта на моќ на претходниот систем.
Од друга страна, поранешниот премиер Виктор Орбан реагираше со обвинувања, нарекувајќи го потегот деспотизам на новата власт. Тој ги повика граѓаните на Унгарија да се префрлат на десноориентираниот приватен канал ХирТВ (HírTV).
