Најмалку пет лица загинаа, а неколкумина се повредени во нов масовен напад со украински дронови врз руска територија. Главни мети на беспилотните летала ноќеска беа големи складишта и логистички центри во близина на Москва и Санкт Петербург, што предизвика големи пожари и привремено го парализираше авиосообраќајот во тие региони.
Украинските сили ја проширија стратегијата на таргетирање економска и логистичка инфраструктура длабоко во внатрешноста на Русија. Според локалните власти и снимките од терен, неколку дронови погодија складишни капацитети што ги користи една од најголемите руски платформи за онлајн продажба во подрачјето на Москва.
Ukrainian attack drones struck another Russian Wildberries e-commerce distribution center in St. Petersburg this morning, setting it on fire. pic.twitter.com/aUTZcm9vAy
— OSINTtechnical (@Osinttechnical) August 4, 2026
Во нападот загинаа пет работници во објектот, додека противпожарните екипи со часови се бореа со огнот кој зафати десетици илјади квадратни метри складишен простор.
Речиси истовремено, бран беспилотни летала го погоди и регионот околу Санкт Петербург, каде што исто така беше пријавен удар во голема складишна зона. Руската противвоздушна одбрана тврди дека соборила повеќе летала, но остатоците од соборените дронови предизвикале дополнителни штети и пожари на цивилни и индустриски објекти.
Поради опасност од нови напади, аеродромите во засегнатите региони привремено ги прекинаа сите летови, а локалните служби спроведоа делумна евакуација на луѓето од непосредната близина на запалените објекти.
Нападите врз логистичките магацини доаѓаат како дел од пошироката кампања на Киев за намалувања на руските капацитети за снабдување и пренос на стоки од општа и воена намена. Украина редовно истакнува дека ваквите објекти се користат за поддршка на руските воени операции, додека руските власти го квалификуваат бранот дронови како директен напад врз цивилна инфраструктура.
Покрај нападите во внатрешноста на руската територија, ескалацијата на судирите го опфати и црноморскиот регион. Според достапните информации, дрон погодил и турски трговски брод што се наоѓал во Црното Море.
Во овој инцидент беа повредени тројца морнари. Локалните поморски власти и служби за спасување реагираа на местото на настанот за да им пружат медицинска помош на повредените членови на екипажот и да ја осигураат стабилноста на пловилото. Инцидентот ја дополнува загриженоста за безбедноста на цивилниот поморски сообраќај во регионот.
