Хрватското здружение на сертифицирани истражувачи на измами предупреди за масовен сајбер напад во кој се компромитирани личните и финансиските податоци на околу 100.000 туристи кои резервирале сместување во земјата. Напаѓачите користат софистицирани фишинг пораки преку апликацијата Вацап, лажно претставувајќи се како сопственици на апартмани или хотели за да извлечат податоци од банкарски картички од гостите.

Како функционира сајбер измамата

Истражувачите појаснуваат дека нападот започнува со пробивање во системите на самите изнајмувачи на сместување на платформата Booking. Кога хакерите ќе преземат контрола врз профилот на одреден сопственик, тие ги преземаат податоците за сите минати и идни резервации, вклучувајќи ги и телефонските броеви на гостите.

Потоа, криминалците директно ги контактираат туристите преку Вацап со порака во која тврдат дека наводно се појавил проблем со плаќањето или верификацијата на резервацијата. Во пораката е прикачен линк кој води до лажна веб-страница, каде од корисниците се бара повторно да ги внесат податоците од своите кредитни картички за да не им биде откажано сместувањето.

Предупредување за македонските туристи

Со оглед на тоа што Хрватска е честа дестинација и за македонските граѓани кои користат онлајн платформи за резервации, експертите советуваат дополнителна претпазливост. Здружението нагласува дека ниту една легитимна платформа за сместување или сопственик нема да бара чувствителни финансиски информации преку приватни пораки на Вацап. Се препорачува сите плаќања и комуникации да се вршат исклучиво преку официјалната апликација на Booking, каде што постојат безбедносни протоколи за заштита на трансакциите.