Управата за хидрометеоролошки работи најави дестабилизација на времето од среда попладне, со локални процеси во форма на невреме проследени со пороен дожд, силен ветер и појава на град. Иако денот ќе почне сончево и топло, попладневните часови носат пресврт поради големата енергија во атмосферата, а нестабилното време ќе се задржи и во четврток, предупредуваат синоптичарите.
Мерните станици на УХМР во 17 часот регистрираа високи температури низ земјата. Најтопло беше во Скопје, каде што на станицата Зајчев Рид максималната вредност достигна 34,1 степен, а кај Скопје-Петровец беа измерени точно 34 степени.
Во Велес живата во термометарот се искачи до 32,9 степени, Тетово забележа 31,5, а во Демир Капија максималната дневна температура изнесуваше 31,9 степени. На повисоките места беше значително посвежо: Попова Шапка регистрираше максимални 20,1 степени, додека во Крушево беа измерени 23,5 степени.
Среда претпладне ќе помине со сончево и топло време, со мала до умерена облачност. Пресвртот започнува во попладневните часови кога развојот на нестабилна облачност ќе услови пороен дожд и грмежи.
Во делови од земјата процесите ќе прераснат во невреме. Ќе дува слаб до умерен ветер од југоисточен правец. Слично време се очекува и во главниот град, каде што попладне делови од котлината ќе бидат зафатени од пороен дожд, грмежи и засилен ветер од јужен правец.
Четврток претпладне исто така ќе биде претежно сончево, но попладне повторно ќе има услови за појава на локално невреме со интензивен дожд и град. Дневните температури на 10 септември ќе се движат од 28 до 35 степени.
Според среднорочната прогноза, петок и сабота носат мало смирување на атмосферата, но локална нестабилност останува можна до крајот на неделата. Максималните температури во петок ќе се движат до 35 степени, додека во сабота се очекуваат до 36 степени.
