Во Кинотеката на Македонија ќе биде прикажан македонскиот игран филм „Убиј ги прво децата“, динамична црна комедија и криминалистичка авантура во режија на Димитар Оровчанец.

Филмот ја носи публиката во скопското подземје, каде навидум обичен мобилен телефон станува причина за опасна и непредвидлива приказна.

Во центарот се тинејџерка балерина, нејзиниот вљубен дечко и неговиот најдобар пријател, кои неочекувано се вплеткуваат во криминален хаос поради компромитирачко видео.

Главните улоги ги толкуваат Миа Жиро, Мартин Ѓоргоски и Стефан Спасов, кои внесуваат свежа енергија во приказната за младешките соништа, стравот, љубовта и суровата реалност.

Сценариото го потпишуваат Димитар Оровчанец и Александар Русјаков, создавајќи филм исполнет со црн хумор, неизвесност и неочекувани пресврти.

„Убиј ги прво децата“ ја имаше својата светска премиера во програмата „Open Air“ на 30. Сараевски филмски фестивал, еден од најзначајните филмски фестивали во регионот.