Аргентинската полиција уапси двајца државјани на Чиле, осомничени дека биле дел од криминална група која организирала кражби во домовите на познати спортски ѕвезди од НБА и НФЛ лигата. Апсењето било извршено на автобуска станица во Буенос Аирес, а осомничените моментално се наоѓаат во притвор додека трае постапката за екстрадиција кон САД.

Според информациите од полицијата, групата внимателно ги следела навиките и патувањата на спортистите преку јавни информации и социјални мрежи. Меѓу метите биле домовите на НФЛ ѕвездите Patrick Mahomes и Travis Kelce, како и поранешниот тенисер Juan Martín del Potro.

Криминалната група, наводно, провалувала и во домовите на НБА кошаркарите Luka Dončić и Mike Conley Jr.. Според американските истражители, разбојниците користеле напредна технологија за да ги заобиколат алармните системи, да блокираат интернет врски и да ги онеспособат безбедносните камери.

Од куќите биле украдени милиони долари, скап накит, спортски трофеи и медали, најчесто додека сопствениците биле надвор од градот. Американските власти претходно предупредија дека организирани криминални групи од Јужна Америка сè почесто таргетираат познати и богати личности.

Во февруари годинава, уште седум чилеански државјани беа обвинети пред федерален суд во Флорида за транспорт на украдена имотна корист преку државни граници, дело за кое е предвидена казна до десет години затвор.