Европскиот туризам продолжува да расте и во 2026 година, и покрај геополитичката неизвесност, поскапувањата и нарушувањата во авиосообраќајот.

Бројот на меѓународни туристи во Европа е зголемен за пет проценти во споредба со истиот период минатата година, додека бројот на ноќевања пораснал за 4,8 проценти, покажува најновиот квартален извештај на Европската комисија за патувања.

Раст е забележан во речиси 80 проценти од европските дестинации, а околу секоја петта земја пријавила двоцифрено зголемување на бројот на посетители.

Грција убедливо на врвот

Најголем раст на туристичките пристигнувања во првите месеци од 2026 година бележи Грција, со зголемување од дури 38,3 проценти.

По неа следуваат Италија со раст од 21,1 проценти и Малта со 16 проценти. Добри резултати имаат и Португалија и Шпанија, додека јужна и медитеранска Европа бележат најголем апсолутен раст на бројот на туристи.

Грција особено се издвојува и според туристичката потрошувачка. Приходите од патувања таму пораснале за 64,3 проценти, што покажува дека не само што пристигнале повеќе гости, туку тие во просек трошеле и повеќе по патување.

Во Италија, пак, бројот на пристигнувања значително се зголемил, но потрошувачката пораснала за само 4,3 проценти, што упатува на пониска просечна потрошувачка по турист.

Туристите патуваат, но многу повнимателно избираат

И покрај економската неизвесност, патувањата остануваат приоритет за европските потрошувачи. Но начинот на кој се избира дестинацијата се менува.

Цената, чувството на безбедност, близината и добриот однос меѓу цената и квалитетот стануваат сè поважни. Туристите сè почесто се насочуваат кон места што се полесно достапни, попознати и пофлексибилни за организирање.

Дури 48 проценти од анкетираните Европејци ја посочиле пристапноста и вредноста за парите како важен фактор за патување, што е значително повеќе од 32 проценти во првиот квартал од годината.

Сè повеќе луѓе го избегнуваат шпицот на сезоната

Патувањата постепено се распоредуваат и надвор од традиционалните летни месеци.

Септември бележи силен раст на резервациите, бидејќи туристите се обидуваат да ги избегнат екстремните горештини, високите цени и пренатрупаните летувалишта.

Интересот за јужна и медитеранска Европа во периодот од јуни до ноември пораснал на 61 процент. Тоа покажува дека летната сезона станува подолга, но и дека туристите сè повеќе бараат помирни периоди за патување.

Кипар и Турција со пад

Не сите дестинации ја започнале годината успешно.

Кипар забележал пад на туристичките пристигнувања од 17,9 проценти, што делумно се поврзува со календарот на велигденските празници, но и со загриженоста поради близината на конфликтите на Блискиот Исток.

Во Турција бројот на туристи се намалил за 2,1 процент, при послаба побарувачка и од европските и од подалечните пазари. Во двете земји се намалила и туристичката потрошувачка.

Европскиот туризам, според извештајот, останува отпорен. Но пораката е јасна: туристите и понатаму сакаат да патуваат, само што повеќе не избираат по секоја цена.