Нападот се случил во вторникот, 22 септември, пред стручно и техничко средно училиште во округот Тургутлу, во турската покраина Маниса. Турските власти соопштија дека сите 11 повредени ученици се на болничко лекување, а состојбата на двајца од нив е сериозна.

Според досегашните информации, осомничениот е 15-годишен ученик од деветто одделение. По пукањето се обидел да побегне пеш, но набрзо бил пронајден и приведен од полицијата.

Американската агенција АП, повикувајќи се на турските власти, објави дека во нападот била употребена ловечка пушка земена од домот на неговата баба, а дека сопственик на оружјето бил дедото. Во рамки на истрагата полицијата ги привела мајката, таткото и дедото на осомничениот.

Се истражува мотивот

Засега официјално не е утврден мотивот за нападот.

Истражителите проверуваат повеќе околности, меѓу кои и информации дека момчето можеби претходно било изложено на врсничко насилство, но властите сè уште немаат објавено конечен заклучок за причините за пукањето.

Турскиот министер за правда Акин Гурлек соопшти дека истрагата ја води Главното јавно обвинителство во Тургутлу и дека на случајот се назначени двајца обвинители.

„Ниту еден пропуст што ја загрозува безбедноста на нашите деца нема да остане без последици“, порача тој по нападот.

Министерот за здравство Кемал Мемишолу потврди дека сите 11 повредени остануваат под медицински надзор.

Турското Министерство за образование испрати и тројца инспектори кои треба да ги испитаат околностите поврзани со нападот и безбедноста во училиштето.

Истрагата продолжува.