Утревечер, во барот „Љубов“, со почеток во 20 часот, започнува караванот за младинска, алтернативна и критичка култура „Тригер“, во организација на Здружението за афирмација на младинската култура „Култура Бета“.

Првиот настан се одржува во рамки на програмата на Скопје прајд викенд и ќе донесе промоција на вториот број од списанието „Тригер“, поетско читање, разговор за современата македонска поезија и диџеј сет на ЕлектраБлосом.

Младинска култура што патува низ шест градови

Караванот „Тригер“ е замислен како серија културни настани низ шест градови во земјава: Скопје, Куманово, Битола, Охрид, Тетово и Штип.

Во секој град, покрај промоцијата на новите броеви од списанието за општа култура „Тригер“, ќе се одржуваат и други културни содржини, меѓу кои промоции на книги, изложби, филмски проекции, музички настани и разговори.

Целта е младинската и алтернативната култура да излезе од еден центар и да се движи низ различни локални сцени, отворајќи простор за критичко размислување, нови автори и поинакви културни средби.

„Згужвани граници“, поезија и разговор во „Љубов“

Првиот настан во „Љубов“ ќе ја претстави и публикацијата „Згужвани граници“, избор од современа македонска поезија. Програмата вклучува поетско читање на авторите застапени во изборот, како и разговор за значењето на списанието „Тригер“ и поетската публикација.

Настанот ќе го модерира Андреј Медиќ Лазаревски, а промоторката Ивана Јовановска, во разговор со Марија Велинова и Стефан Спасовски, ќе ги воведе присутните во концептот, идејата и значењето на списанието и изборот „Згужвани граници“.

Вечерта ќе заврши со диџеј сет на ЕлектраБлосом, со што првиот настан од караванот ќе ја спои книжевноста, младинската култура, музиката и критичкиот разговор во еден отворен простор.

Култура како простор за дијалог

Караванот за младинска, алтернативна и критичка култура „Тригер“ е поддржан во рамки на проектот „Култура за развој“ на Владата на Швајцарија, кој го имплементира Хартефакт Фонд.

Проектот го поддржува независниот културен сектор во Македонија и ја користи културата како алатка за поттикнување критичко размислување за општествените прашања што се важни за локалните заедници.

Преку вакви програми, целта е да се зајакнат социјалната кохезија, демократските процеси и општествениот дијалог, но и да се охрабри соработката меѓу културните организации, институциите и локалните заедници.