Американскиот претседател Доналд Трамп во телевизиско појавување повторно тврдеше дека изборите во 2020 година, на кои загуби од Џо Бајден, не биле легитимни. Тврдењата доаѓаат пред изборите на средината на мандатот, додека администрацијата истовремено ослабува институции задолжени за заштита на изборниот процес.
Трамп во телевизиско појавување повтори дека изборите на кои изгуби од Бајден биле незаконити. “Американските избори се подложни на манипулација и кражба”, изјави Трамп, додавајќи дека по неговиот пораз била изгубена довербата на американскиот народ. Тврдењата, за кои нема докази, доаѓаат пред изборите на средината на мандатот, на кои партијата на претседателот вообичаено губи дел од моќта. Според најнови анкети, Трамп го поддржуваат 37 отсто од гласачите.
Активисти за бирачки права сметаат дека Трамп однапред се обидува да ја поткопа довербата во изборите во 2026 година. Целта, велат тие, е да се создаде простор за оспорување на резултатите доколку републиканците имаат слаб резултат. Адриан Фонтес, државен секретар на Аризона задолжен за спроведување на изборите, изјави дека најголемата закана за американските избори доаѓа од постојаните лаги што излегуваат од Белата куќа. Трамп дополнително ја обвинува и Кина за вмешаност во изборите во 2020 година.
Истовремено бара донесување на законот Save Act, кој на сојузната влада би ѝ дал поголемо влијание врз изборните правила. Проблемот е што изборите во САД не ги води сојузната власт, туку сојузните држави и локалните власти.
Гласањето по пошта е една од главните мети на администрацијата. Трамп со години го поврзува со измами, иако самиот гласал на таков начин. Демократските гласачи гласаат по пошта нешто почесто од републиканците, што според критичарите е причина зад притисокот врз овој модел.
Според предлог на американската пошта, сојузните држави би морале да испраќаат податоци за гласачите до Вашингтон, а сојузната власт потоа би означувала кој наводно нема право на глас. Против планот се поднесени повеќе тужби, а еден судија веќе го прогласи за неуставен.
Трамп сè почесто ги напаѓа и електронските машини за гласање. Неодамна сугерираше дека можат да бидат компромитирани од странски актери, повикувајќи се на кинеско собирање на јавно достапни изборни податоци. Американските истражители, сепак, заклучија дека Кина не се вмешала во изборите.
Дел од експертите се плашат дека Белата куќа во последен момент би можела да се обиде да го блокира користењето на одредени машини, повикувајќи се на национална безбедност. Предупредуваат и дека сојузна истрага по изборите би можела да го забави преброjувањето на гласовите или потврдувањето на резултатите во одредени држави.
Администрацијата на Трамп истовремено ослабна дел од институциите што помагаат во заштитата на изборите. Агенцијата за кибернетичка и инфраструктурна безбедност остана без дел од персоналот задолжен за изборни закани.
Демократите и организациите за бирачки права предупредуваат дека реториката на Трамп може да има сериозни последици. Потсетуваат на нападот врз Капитол на 6 јануари 2021 година, кој следеше по неговите тврдења дека изборите биле украдени.
